𝐌𝐚𝐬𝐚𝐦𝐚 𝐚𝐧𝐠 𝐌𝐚𝐤𝐢𝐬𝐚𝐦𝐚

---

𝙐𝙣𝙖𝙣𝙜 𝙖𝙧𝙖𝙬 𝙣𝙜 𝙥𝙖𝙠𝙞𝙠𝙞𝙨𝙖𝙢𝙖

Di-hamak na labis ang saya;

ako’y hinirang, itinanghal na tila tala.

Porma’y tuluyang inayos, hinubog ang diwa,

sa pag-asang ako’y makasama.

𝙐𝙣𝙖𝙣𝙜 𝙗𝙪𝙬𝙖𝙣 𝙣𝙜 𝙥𝙖𝙠𝙞𝙠𝙞𝙨𝙖𝙢𝙖

Di-hamak na ang mundo ko’y nag-iba,

lalo pa’t unti-unti kitang nakilala.

Dating tindig ay aking iniba,

lahat maibigay lamang upang makisama.

𝙐𝙣𝙖𝙣𝙜 𝙩𝙖𝙤𝙣 𝙣𝙜 𝙥𝙖𝙠𝙞𝙠𝙞𝙨𝙖𝙢𝙖

Di-hamak na nasilaw sa liwanag mong dala,

unti-unti akong nawala.

Sariling tinig ay natahimik na,

tuluyang isinuko ang tama sa ngalan ng pakikisama.

𝙃𝙪𝙡𝙞𝙣𝙜 𝙖𝙧𝙖𝙬 𝙣𝙜 𝙥𝙖𝙠𝙞𝙠𝙞𝙨𝙖𝙢𝙖

Di-hamak na may ngiti pa ring nadama habang kasama ka;

mga kuwentuhang masaya na siyang pansamantalang payapa.

Ngunit bakit sa salamin ay ibang "ako" ang nakita?

Ang dating mapayapa ay napasama.

Di-hamak na tunay nga,

at aking aminadong nadarama;

na hindi lahat ng pagsasama ay may dulot na maganda.

Kaya ngayon na haharap muli sa madla,

aking napagtanto na…

𝙈𝙖𝙨𝙖𝙢𝙖 𝙧𝙞𝙣 𝙥𝙖𝙡𝙖 𝙖𝙣𝙜 𝙢𝙖𝙠𝙞𝙨𝙖𝙢𝙖. [F]

Isinulat ni Leonora

Guhit ni miospring